भक्तपुर: भक्तपुरमा नौ दिन आठ रातसम्म मनाइने प्रसिद्ध बिस्केट जात्रा गए रातिदेखि सम्पन्न भएको छ ।
गत चैत २७ गते तौमढीबाट भैरवको रथ तानेर शुरु भएको जात्रा गएकाे राती गःहिटीबाट रथ तानेर सम्पन्न भएकाे हाे ।
सौरमासका आधारमा चल्ने यो जात्रा नव वर्षको चार दिनअघिदेखि तान्त्रिक विधिअनुसार प्रारम्भ गरी वैशाख ५ गते रथ तानेर जात्रा सम्पन्न गर्ने परम्परा छ ।
जात्राको अन्तिम दिन साँझ गःहिटीबाट रथ तान्न शुरु गरिएको थियो । स्थानीयले गःहिटीबाट तल र माथिका बासिन्दाले माथितर्फ गरी आआफ्नो क्षेत्रमा लैजान रथ तानेका हुन् । स्थानीयले रथ तानेर वंशगोपाल पु¥याएपछि राति ९ बजे रथलाई तानेर पुनःनासमनातर्फ लगेकाे महानगरीय प्रहरी परिसर भक्तपुरका प्रवक्ता कृष्ण प्रसाईंले जानकारी दिनुभयो ।
राति अबेरसम्म जात्रा शान्तिपूर्णरुपमा मनाइएको उहाँले जानकारी दिनुभयो । जात्रामा हिंसा हुन नदिन एक हजार ३०० प्रहरी परिचालन गरिएको छ ।
काठैकाठले प्यागोडा शैलीमा निर्माण गरिएको तीनतले भैरवनाथको रथमा भैरवनाथको मूल देवता र बेताल देवतालाई विराजमान गराइसकेपछि परम्पराअनुसार गःहिटीबाट माथिल्लो र तल्लो क्षेत्रका बासिन्दाले रथ तानेको छ ।
रथलाई तानिसकेपछि आजै रातिसम्म रथलाई पाँचतले मन्दिर अगाडि तौमढीमा लगेर राखी रथबाट भैरव देवतालाई झिकेर मन्दिरमा लगेर विराजमान गराएपछि जात्रा सम्पन्न गरियाे । बिस्केट जात्रा बिःसीत (नागनागिन म¥यो) भन्ने भावका आधारमा लिच्छविकालदेखि मनाइँदै आएको छ ।
